السلام عليكم

أولا سامحونى عشان أنا عملت المدونة وسبتها فاضية من غير ولا موضوع واحد كدا كام يوم ،، لكن كنت فى انتظار الناس يحضروا اللى بعتت لهم ودلوقت بعضهم حضر ولسه فى شوية أتمنى إنهم يوصلوا على خير

ييجى السؤال بقى

هو أنا عملت المدونة دى ليه أصلا؟!!!!

أنا من زمان كان نفسى أعمل لنفسى مدونة لوحدى وكنت عملت واحدة وبعدين مسحتها أو ضاعت مش فاكرة

المهم يعنى آخرتها انى لو عملت مدونة ليا لوحدى هقعد أخرف عليها أى كلام وبعدين برضه فى الآخر همسحها .......على أى حال أنا عملت المدونة ىا بدافع رئيسى وهو إنى ما أفقدش الصلة بناس بيشاركونى اهتمامى واستفدت منهم على مدار سنة أو أكتر بشكل كبير جدا سواء فى النادى ( طيب الله ثراه) أو فى المنتدى أيام زمان برضه

ورأيي الشخصى إنها كانت مجموعة إلى حد كبير حققت نجاح مع بعض كنا نتمنى إنه يستمر

على أى حال ماحدش بيعيش لوحده وماحدش بيكتب بيكتب لوحده لازم يبقى فى وسط ناس مهتمين وإلا ممكن جدا يهمل الموضوع إهمال شنيع

أنا مش بطلب من أى حد من الزملاء الأعزاء أى حاجة ممكن تعطله بس وقت فراغه ولما يحب يطلعنا على عمل أهلا بيه أو مش عمل وبس لو حابب يعرفنا على حد كاتب مثلا له وزن أو على موضوع أو على كتاب أو على أى حاجة تهمه ويحب يشاركنا اهتمامه ده ياأهلا بيه بإذن الله سيجد أذن صاغية وحتى لو عاوز يتكلم فى موضوع هامه ،، ممكن برضه
والنشر هنا لا يتعارض بأى حال من الأحوال مع المنتدى مثلا لحد يفتكر إنى أقصد كدا..... أبدا

بس هو هنا الدنيا أصغر شوية وunder control يعنى اللى بيكتبوا واللى هيردوا ناس احنا عارفينهم كويس وبنهتم نسمع ردودهم وكمان ممكن نحجبها عن أى حد غير اللى احنا عاوزينهم يشوفوها يعنى مكان مغلق شوية واللى فيه إن شاء الله مهتمين

أتمنى انكم تبدأوا هنا بجد أو يعنى ما تترددوش فى تنفيذ أى فكرة تخص المدونة تيجى على بال حد فيكم

ياريت كل واحد يهدينا حاجة يختارهالنا سواء من أعماله أو حاجة بيحبها لحد ما المدونة تمتلئ شوية دا بس رجاء فى الأول بعد كدا براحتكم

أنا هبقى معاكم باسم Feda إن شاء الله بعد كدا

أهلا وسهلا بيكم

نورتونا ،،

يارب المدونة تسعدكم وتسعدوها

لو حد عنده أى تعليق على المدونة كفكرة أو على الإنشاء أو عنده أى اقتراح أو أى رد يتفضل يسعدنا ويقوله